Marabedís

A Coordinadora da Festa da Istoria escolleu o marabedí como unidade de cambio obrigatoria dentro do circuíto delimitado para a Festa na cidade histórica de Ribadavia.

Esta moeda foi a unidade monetaria predominante na Idade Media como unidade de conta e como moeda tanxible, sendo inicialmente de ouro, logo de prata e, finalmente, de vellón (aleación prata-cobre), mantendo a súa hexemonía nos sistemas monetarios da Idade Moderna ata finais do Antigo réxime no amencer do s. XIX.

A recuperación do marabedí como moeda de uso exclusivo na Festa da Istoria foi un proceso longo e discutido pola organización e de difícil posta en práctica no desenvolvemento da propia Festa. O marabedí aporta singularidade e diversidade á Festa, favorecendo a viaxe a un pais e un tempo imaxinarios.

É de uso obrigatorio nos postos de rúa e de artesáns da Festa e recomendable en tódolos establecementos de Ribadavia. Cada ano se imprimen marabedís en sete valores.

No marabedí recóllense imaxes da propia Festa e de Ribadavia realizadas a plumilla e en gravado.

A casa de trocos do Banco Alhóndiga conta, para o seu funcionamento, coa vo desinteresada de máis de 60 voluntarios, a maioría traballadores/as dos bancos e caixas de aforros da vila e de toda a provincia que se organizan en quendas.

Para facilitar o numeroso cambio que se solicita, nos últimos anos, creáronse as caixas rápidas (de valores fixos).

A primeiras horas da tarde ábrense caixas de retroco para todos os participantes na Festa, funcionando ata as primeiras horas da noite. Esa mesma noite se fai o retroco para tódolos artesáns que teñan participado na Festa e a tarde do día seguinte se fai o retroco para tódolos establecementos de Ribadavia e postos de rúa.