Pregón e entrega de medallas

O pregón da Festa da Istoria, cunha linguaxe actual ou antigua, serve para situarnos e introducirnos na historia medieval e na propia festa a tódolos alí presentes, utilizando normalmente un feito histórico real ou inventado relacionado con Ribadavia ou co Ribeiro.

O Pregoeiro, persoa relacionada con Ribadavia ou ca Festa da Istoria, trata de entronizarnos no medievo e no espírito e cultura dunha vila medieval que trata de desfrutar un día de lembranza en paz e camaradería.

Neste acto de comezo da Festa e co ornato e a presencia do Rei Don Pedro e da Raíña Dona Ana e coa Praza Maior ateigada de xente, vestida de época, pendente de encomezar a Festa, a Coordinadora fai un recoñecemento público a un grupo de persoas que durante os últimos anos teñen colaborado dunha forma desinteresada na organización, enxalzamento ou financiación da Festa.

O Rei nomea Notables da Istoria e os nomeados reciben das súas mans un pergamiño que así o acredita xunto coa Medalla de Prata conmemorativa da Festa da Istoria, exclusiva dos Notables.