Xogos para nen@s

De sempre os nenos recibiron unha atención preferente por parte da organización da Festa da Istoria, por ser un núcleo importante de voluntarios, que colaboran durante todo o ano e están sempre dispostos a participar.

Dúas son as actividades específicas que para os nenos e nenas se organizan o día da Festa: os xogos populares e tradicionais e marionetas ou monicreques.

A organización da Festa da Istoria traballa na recuperación de xogos populares e tradicionais e ata o día de hoxe protagonizan a Festa xogos como os seguintes: os de lanzar (a ra, a chave, a billarda, etc.); os de correr e saltar (a pita cega, o pano, a corda, o cabalo, a carreira de sacos, etc.); os colectivos (tirar da corda, lanzamentos, etc.), e outros (romper as olas, o da fariña, a roda, buscar os nenos, etc.).

Para os máis pequenos se representan, tódolos anos, obras axeitadas a súa idade e de ambiente medieval (príncipes e princesas, reis e raíñas, cabaleiros, trobadores, dragóns…) no teatro de monicreques que realizan o grupo de voluntarios do teatro de monicreques da Istoria.